EFNAHAGSÁRÁS OG GLÆPUR.

Forseti Íslands synjaði ICESAVE 5. janúar í fyrravetur.

 

ICESAVE glæpurinn er mesta niðurlæging og versta efnahagsárás og kúgun gegn okkur og börnum okkar fyrr og síðar.  Og fullkomlega óþolandi að alþingismenn og ríkisstjórnin skuli ætla að pína stórhættulega nauðung yfir landsmenn með öllum ráðum.  

Í fyrravetur kolfelldum við nauðungina í þjóðaratkvæðagreiðslu.  Hinsvegar dugði það ekki.  Ótrúlega fór fjármálaráðherra landsins langt úr vegi sínum á fund Breta og Hollendinga til að fá nú að semja um að kúgunin gegn okkur yrði örugglega endurtekin.  Hann fagnaði fundunum opinberlega.  Stjórnmálamenn vilja málið ekki í dóm fólksins og hafa enn ekki lært að það er alþýða landsins sem fer með fullveldið, ekki stjórnmálamenn.

Í 3ja sinn hefur núverandi ríkisstjórn, ICESAVE-STJÓRNIN, farið gegn vilja þjóðarinnar og samið um ólöglega ríkisábyrgð á ICESAVE, skuld einkabanka sem við erum engan veginn ábyrg fyrir og kemur okkur ekki við.  Hafði ríkisstjórnin leyfi til að fara aftur og semja um mál sem við felldum? 

Gegn okkar getu og vilja og gegn lagaákvæðum og stjórnarskrá fer alþingi og núverandi ríkisstjórn endurtekið fram með ósvífna rukkun Evrópuvelda gegn okkur.  Samt hefur enginn dómur fallið í málinu og dómur gegn okkur ólíklegur.  Þar fyrir utan eru sterkar vísbendingar um að ríkið nálgist gjaldþrot og verði gjaldþrota með ríkisábyrgð á ICESAVE.

Getur alþingi eða hluti þjóðarinnar kosið lögleysu yfir hinn hlutann eða verður að kæra málið?   

Elle Ericsson.

 

 

NIÐURSTAÐA OKKAR ER SKÝR, STEINGRÍMUR.

Nú fyrir skömmu á þessum drungalega og skýjaða degi kusu ótrúlega 44 alþingismenn ICESAVE nauðungina yfir æsku landsins í 3ja sinn og gerðu daginn kolsvartan og niðurlægjandi fyrir foreldra þeirra.  Líka fyrir gamalmenni sem hafa miklar áhyggjur af afkomu og velferð afkomenda sinna.  Og alþingi bætti ofan á skömmina og felldi 2 tillögur um að málið færi í dóm þjóðarinnar.  Maður er næstum orðlaus yfir endalausri ósvífni helferðarstjórnarinnar.  

Steingrímur heldur fram að niðurstaða alþingismanna og ICESAVE-STJÓRNARINNAR sé skýr.  Eins og við vitum það ekki.  Hefur það farið framhjá nokkrum manni að nánast það eina sem ríkisstjórnin hefur unnið við sl. 2 ár hefur verið að eyða skattpeningum okkar í bankana og vinna að því dag og nótt að gera gamalmenni og æsku landsins að skuldaþrælum evrópskra stórvelda?  Við bjuggumst vel við þessari útkomu um ICESAVE frá ykkur, Steingrímur. 

Nú fari vonandi að sjá fyrir endann á ICESAVE, segirðu Steingrímur.  Já, Steingrímur, en ekki með þeim hætti sem þú vilt.  Nú hafa nefnilega yfir 33700 manns á minna en 5 dögum skrifað undir undirskriftalista þar sem heitið er á forsetann að synja ómennskri kúgun ykkar gegn landsmönnum.  Við erum líka stálheppin að vera með lýðræðissinnaðan og mennskan forseta við völd og erfitt verður að trúa öðru en að sá mæti og vitri maður synji andstjórnarskrárlegri og kolólöglegri niðurstöðu ykkar, ÓLÖGUM YKKAR.

Elle Ericsson.

„Skýr niðurstaða“

Glæsilega gengur þessi undirskriftasöfnun – og ráðamenn skelfast

Það fær þá samt ekki ofan af sínum illa ásetningi. Aumleg eru rökin sem Oddný, formaður fjárlaganefndar, notaði t.d. í dag til að verjast gagnrýni, m.a. frá Gunnari Braga Sveinssyni, þingflokksformanni Framsóknarflokksins, sem var einarður í málinu, eins og Pétur H. Blöndal hefur mannað sig upp í líka, eftir smá-meðvirknikast um daginn (í útvarpsviðtali með formanni Baldurs í Kópavogi, hinum stefnufasta sjálfstæðismanni Þorsteini Halldórssyni). Batnandi mönnum er bezt að lifa, Pétur!

Nú, kl. 22.16, hafa 26.050 skráð sig á Kjósum.is, 1050 fleiri en í frétt Mbl.is. 

Ekkert Icesave! – þjóðin er saklaus og á ekkert að borga!

 jvj 

Um 25.000 á kjósum.is

Þingmenn eiga – ekki frekar en að senda svikafrumvarp á ljóshraða gegnum þingið – ekki að taka þátt í þeirri hjáleið að leggja Icesave á okkur í formi bankaskatts eða hærri vaxta!

Krafa brezkra og hollenzkra boðflenna í máli þessu er gersamlega ólögvarin og frumvarpið fullt af margvíslegum hneykslunarefnum vegna beinna lagabrota.

Þess vegna er raunalegt að sjá Lilju Mósesdóttur leggja til að hækka bankaskattana – fyrir enga aðra en fyrir Breta og Hollendinga – en það mundi leiða til aukins vaxtamunar og verri kjara íslenzkra lántakenda. Þessa tillögu studdi hún þó í viðskiptanefnd Alþingi, þar sem hún er formaður.

Hún var á góðri leið með að verða heilög að áliti sumra, eins og Jóhanna forðum daga, en nú er aldeilis komið ryk á geislabauginn, þykir okkur hér í Þjóðarheiðri.

Hitt má hún eiga, að í fréttinni (tengill neðar) kemur hún upp um ofurflýti ráðamanna við að skófla þessu bannsettu Icesave-frumvarpi í gegnum þingið og helzt á mettíma – að því er okkur virðist í kapp við tvennt: undirskriftasöfnun Samstöðu þjóðar gegn Icesave (Kjósum.is) og heimkomu forseta Íslands úr stuttri utanlandsferð!

Undirritaður finnur það eitt sér til hugarhægðar þessa dagana að lesa í Þórði kakala, frábærri bók Ásgeirs Jakobssonar, en með nýjum hætti virðist mér pólitíkin hér hafa nálgazt sumt það versta í anda Sturlungaaldar. Ekki vantar a.m.k. margföld svik og eiðrof ráðamanna.

En hér er annað enn betra lesefni fyrir daginn: frábær grein eftir lögfræðinginn Völu Andrésdóttur Withrow, nýbirt, efst á Moggabloggi hennar: vala.blog.is, og nefnist 'Icesave afturgöngur'.

Jón Valur Jensson. 

„Icesave afgreitt of hratt“

Icesave-flokkarnir þrír ætla að fella allar tillögur um þjóðaratkvæðagreiðslu í þinginu!

Sú fyrsta var felld í fjárlaganefnd í dag, jafnvel Kristján Þór Júlíusson tók þátt í því þrátt fyrir friðunarhjal sitt um daginn! Er það satt, sem ýmsir telja, að hann geri ekkert sem hinn ESB-hlynnti Samherji vill ekki? Aðeins tveir þingmenn, Þór Saari og Höskuldur Þórhallsson, greiddu atkvæði með tillögunni í þessari stóru þingnefnd, þar sem Sjálfstæðisflokkurinn á þrjá fulltrúa, en ríkisstjórnin auðvitað meirihlutann.

Andstætt þessu lýðræðis-óttaslegna liði – því sitjandi alþingi sem nýtur um 7% trausts meðal þjóðarinnar – og þrátt fyrir einhæfan áróður stjórnvalda og ríkisfjölmiðla um þetta sem "betra" – gott ef ekki "gott" frumvarp! – segist meirihluti aðspurðra í nýlegum skoðanakönnunum (síðast rúm 62% í dag) vilja þjóðaratkvæðagreiðslu um málið.

Ef þjóðinni er ætlað að borga fyrir skuldir óreiðumanna, þá verður ekki fram hjá því gengið, að hún á að fá að segja sitt um þann ásetning alþingismanna – þeirra sem sýnt hafa sig reiðubúna til að svíkja af Íslendingum margvísleg lagaleg réttindi í þessu ömurlega Bretavinnumáli. 

Jón Valur Jensson.

Tillaga um þjóðaratkvæði felld

9.430 áskorendur skrifuðu undir á Kjósum.is á nákvæmlega tveimur sólarhringum

Átakinu var hleypt af stokkunum kl. 22.15 í fyrrakvöld, skv. vefstjóra þess vinsæla vefs, Kjósum.is. Nú skelfast Icesave-sinnarnir, eins og sést á taugaveikluðum skrifum þeirra, og trúlega einnig Icesave-stjórnin innan sinna hallarmúra.

"Illt er í efni, að þjóðin ætlar að fara að ráða þessu einu sinni enn!" heyrast þeir stynja – kannski ekki orðrétt svona, en einn Samfylkingarsinninn, Stefán bróðir Katrínar Júlíusdóttur, sat úti í Berlín í dag og skrifaði í bloggi sínu: "Ég ætla nú rétt að vona að það komi ekki til þjóðaratkvæðagreiðslu um Icesave." Og í langsóttri vörn sinni átti hann þetta lokatromp á hendi:

• "Í raun munu Íslendingar ekki greiða Icesave, heldur íslenska ríkið." [Svo!!!]

Þessi undarlegi Icesave-meinlokuþankagangur verður eflaust mikið rannsóknarefni síðar meir, en flestir heilsteyptir og eðlilega þenkjandi Íslendingar taka undir með Sigmundi Davíð Gunnlaugssyni, sem sagði í þætti á Útvarpi Sögu sem þar var endurvarpað í kvöld:

• "Við megum ekki skrifa upp á óútfyllta ávísun fyrir upphæð sem getur numið 200 milljörðum. Ef þeir ætla að láta þjóðina borga þetta, þá verða þeir að fá leyfi til þess í þjóðaratkvæðagreiðslu." (Skrifað hér upp nokkurn veginn orðrétt – og efnislega rétt.)

Þið sem hafið ekki séð vefsíðuna, hún er hér: Kjósum.is!

Jón Valur Jensson. 

Undirskriftir nálgast 9.000

Yfir 7000 hafa skráð sig á Kjósum.is til að skora á Alþingi og forsetann að hafna Icesave-III-lagafrumvarpi

Það er rífandi gangur í þessari undirskriftasöfnun sem hófst seint í fyrrakvöld. Án einnar einustu auglýsingar eru áskorendur nú orðnir 7.185 (kl. 14.44). Einnig þetta er tækifæri þjóðarinar til að ræða við ráðamenn sína sem stundum villast af leið og ruglast jafnvel í ríminu þegar kemur að virðingunni fyrir stjórnarskrá og lögum landsins, eða vita þeir ekki, að þeim leyfist ekki að gefa út opinn víxil fyrir greiðslu seinni kynslóðar á uppspunninni ofurskuld – já, í því tilfelli þegar engin greiðsluskylda hafði myndazt (sjá 77. gr. stjórnarskrárinnar)?

Jón Valur Jensson. 

Sex þúsund manns gegn Icesave

5.700 undirskriftir á 36 tímum undir áskorun, sem beinist gegn Icesave-III, auglýsingalaust og án kynningar í blöðum og sjónvarpi

Þannig er staðan nú, seint á 11. tímanum á sunnudagsmorgni. Látum berast um allt, á Facebók, í bloggi, í spjalli og með bréfasendingum til vina og kunningja, að vefslóðin á undirskriftasöfnun Samstöðu þjóðar gegn Icesave er þessi: Kjósum.is ! Sjá nánar í greinum hér á síðunni: Þjóðarheiður.

Undirskriftasöfnun gegn Icesave miðar vel

Þegar þetta er birt hefur tala áskorenda á síðunni Kjósum.is farið yfir 4.800, þrátt fyrir algjöra þögn sjónvarpsstöðvanna í aðalfréttatímum dagsins. Þetta er þjóðhollum Íslendingum ekkert nýnæmi. Þessi skortur á lýðræðislegri umræðu er það ástand sem við höfum orðið vitni að, í þau tvö ár sem Icesave-stjórnin hefur setið við völd.

Er Icesave-stjórnin betri en sú ríkisstjórn Egyptalands sem hrökklast hefur frá völdum? Margir telja að svo sé raunverulega ekki og bera gjarnan saman þau Jóhönnu Sigurðardóttur og Hosni Mubarak. Mubarak merkir "eldsnöggur maður", en ekki verður séð að hann sé mjög snöggur og varla er hægt að tala um snöggu Jóhönnu. Bæði eru þau sem visnaðar greinar á deyjandi mosagrónu tré.

Almenningur hefur mátt þola óhæfa stjórn Jóhönnu í tvö ár. Flestum þykir því nóg komið af þessum skandinavíska draumi sem frá fyrsta degi hefur verið martröð. Auðvitað er ekki hægt að vænta mikils af fólki sem er í þjónustu erlends valds og hampar framandi hugmyndafræði. Forsetinn ætti að losa þjóðina við þetta óhæfa fólk og hugsanlega tilkynnir hann það í Silfrinu á morgun.

Til upprifjunar um viðhorf forsetans til lýðræðisins má vísa til orða hans í yfirlýsingu forsetans frá 05. janúar 2010. Þar stendur:

• Hornsteinn stjórnskipunar íslenska lýðveldisins er að þjóðin er æðsti dómari um gildi laga. Stjórnarskráin sem samþykkt var við lýðveldisstofnun 1944 og yfir 90% atkvæðisbærra landsmanna studdu í þjóðaratkvæðagreiðslu felur í sér að það vald sem áður var hjá Alþingi og konungi er fært þjóðinni. Forseta lýðveldisins er svo ætlað að tryggja þjóðinni þann rétt.

Nú bíða menn spenntir efir að vita hvort forsetinn gefur yfirlýsingu um að hann hafi tekið stjórnar-umboðið af Jóhönnu og að hann muni setja öll Icesave-lög í þjóðaratkvæði.

Loftur Altice Þorsteinsson. 

Menn skora á þingið og forsetann að samþykkja ekki Icesave-frumvarpið

Átakið Kjósum.is á vegum Samstöðu þjóðar gegn Icesave – regnhlífarsamtaka fólks í mörgum flokkum og hreyfingum sem og þekktra einstaklinga – hefur gengið ágætlega þrátt fyrir sáralitla kynningu og engar auglýsingar. Frá því seint á 11. tímanum í gær til kl. 17.12 í dag hafa 3.000 manns skrifað undir áskorun þar um að Alþingi hafni frumvarpi um ríkisábyrgð vegna Icesave-reikninga Landsbankans; heitið er á forseta landsins að synja slíku frumvarpi staðfestingar, verði það samþykkt á Alþingi.

"Ég vil að þjóðin fái að úrskurða um þetta mál," segir í lok þessarar áskorunar, þar sem fjölmargir eiga væntanlega eftir að tjá þennan vilja sinn.

Farið inn á Kjósum.is – smellið hér og kynnið ykkur síðuna, skrifið sem flest undir til að stuðla að því, að ykkar lýðræðislegi réttur til að úrskurða um þessa nýju risaskuldbindingu á okkar herðar og barna okkar verði virtur í verki með þjóðaratkvæðagreiðslu – rétt eins og daginn góða 6. marz 2010.

Efnt verður til blaðamannafundar á vegum aðstandenda þessarar áskorunar í Þjóðmenningarhúsi (Safnahúsinu við Hverfisgötu) á mánudagsmorgun kl. 11. 

Stöndum nú öll á réttinum, Íslendingar, látum ekki leggja á okkur ólögvarðar risafjárkröfur sem brjóta á sjálfri stjórnarskránni og lagalega tryggðum rétti okkar.

Jón Valur Jensson. 

Undirskriftir gegn Icesave