Er vítahringur niðursveiflu hafinn ?

Líklega er staðan jafn slæm og Þór Saari vill meina. Ríkisstjórnin hefur neitað að auka hagvöxt með erlendri jafnt sem innlendri fjárfestingu. Í stað þess hefur hagkerfið verið keyrt niður í frostmark, í þeim tilgangi að mynda afgang af vöruskiptum við útlönd.

Eigið fé í atvinnurekstri er nánast hverfandi og arðsemi hvergi að finna. Sama gildir um heimilin, sem í auknum mæli munu sæta nauðungarsölum. Á þessu ári getum við búist við verðhjöðnun, sem vissulega mun minnka vísitölu-tryggðar skuldir. Hins vegar munu eignasölur nær hverfa, vegna væntinga um enn lægra verð.

Haft er eftir Þór, að ríkið verði að auka skattheimtu og skera niður í opinberri þjónustu, til að komast ekki í greiðsluþrot. Aðstæður fyrirtækja og heimila munu því halda áfram að versna og tekjur ríkisins að minnka. Þetta er vítahringur sem erlendir sérfræðingar hafa verið að vara við.

Eina leiðin út úr svona stöðu er að semja um niðurfellingu skulda, sem Icesave-stjórnin er í barnaskap sínum búin að safna af miklu kappi. Við blasir algert hrun hagkerfisins, nema brugðist verði hart við og alvöru fjárfestingar komist í gang. Algjör fásinna er að halda að óarðbærar vegaframkvæmdir geti dregið þennan þunga vagn, og eins og áður er höfuðsynd að bæta ólögvarinni Icesave-kröfu nýlenduveldanna ofan á afar þungbær ríkisfjármál.

Loftur Altice Þorsteinsson.

Eykur líkur á greiðsluþroti ríkisins

Icesave-stjórnin ofsahrædd um að falla: paník-viðbrögð í fjárlaganefnd

Augljóst er af frétt Vísis.is að Icesave-stjórnin er HRÆDD VIÐ AÐ FALLA á næstunni. Skyndilega við dóm Hæstaréttar um stjórnlagaþing reif hún Icesave-málið út úr fjárlaganefnd, ófaglega, beið ekki eftir áliti annarra þingnefnda eins og venja er!

Eins og fyrri daginn eru það ær og kýr Steingríms og Jóhönnu að "fá" að greiða Icesave fyrir Landsbankann.* Langt er þó gengið, að þau ætli sér að vinna það verk á síðustu metrum þessarar stjórnar, en á þingmönnum í fjárlaganefnd er að skilja, að dómur Hæstaréttar yfir stjórnlagaþings-klúðri stjórnvalda** hafi valdið skyndilegri paníkeringu í nefndinni, meirihlutinn reif Icesave-málið allt í einu út úr nefndinni óunnið og í ósætti og án þess að hafa fengið umbeðið álit efnahags- og skattanefndar og viðskiptanefndar Alþingis.

Álit fjárlaganefndar er því ekki marktækt í raun – en mikið lá þeim á í meirihlutanum þar, þeim sem samþykktu þessa bráðræðisgjörð gegn mótatkvæðum.

Í aðdraganda þessa hafði mikið gengið á í sambandi við símtal Davíðs Oddssonar og seðlabankastjóra Englands, og þar er ljóst, að meirihluti Icesave-sinna í fjárlaganefnd vildi EKKI aflétta trúnaði á því viðtali (nánar HÉR!), sama þótt þjóðarhagsmunir lægju við! Já, vitaskuld hefur það þýðingu fyrir Icesave-málið og áróðurs- og sóknarstöðu okkar gagnvart Bretum, hafi þeirra eigin seðlabankastjóri látið í ljós það álit, að íslenzka ríkið sé ekki ábyrgt fyrir Icesave-skuld Landsbankans!

Andstæðingar Icesave-III-frumvarpsins vilja láta birta viðtalið, en ekki Icesave-borgunarsinnarnir. Hvað segir það okkur?!

Hér er frétt Vísis.is:

• Vísir, 27. jan. 2011 12:15
• Icesave afgreitt í ósætti út úr fjárlaganefnd
• 
• Höskuldur Þórhallsson, þingmaður Framsóknarflokksins.
• Höskuldur Kári Schram skrifar:
• Þingmenn stjórnarandstöðunnar telja að stjórnlagaþingsmálið hafi orðið til þess að Icesave-frumvarpið hafi verið afgreitt í ósætti út úr fjárlaganefnd.
• Icesave-frumvarpið var afgreitt úr fjárlaganefnd í gær. Fulltrúar stjórnarandstöðunnar voru ósáttir við þessa afgreiðslu en þeir höfðu óskað eftir meiri tíma til að fjalla um málið.
• Höskuldur Þórhallsson, fulltrúi Framsóknarflokks í fjárlaganefnd, sagði í samtali við fréttastofu í gær að niðurstaða hæstaréttar í stjórnlagaþingsmálinu hafi haft áhrif afstöðu stjórnarliða í málinu. Vísar hann til þeirra ummæla sem féllu á Alþingi eftir ákvörðun hæstaréttar lá fyrir.
• „Það var einhver óróleiki kominn í meirihluta fjárlaganefndar, ætli það helgist ekki af atburðum gærdagsins, svo ég reyni nú að rýna aðeins í það. En mér fannst það mjög dapurlegt að þeir skyldu ákveða að rífa málið út í ósætti," segir Höskuldur.
• Undir þetta tekur Þorgerður Katrín Gunnarsdóttir, fulltrúi Sjálfstæðisflokks í nefndinni, sem segir að samstarfið hafi gengið mjög vel þangað til í gær.
• „Það er ákveðin tortryggni í gangi. Framkoma forsætisráðherra í gær hjálpaði ekki mikið upp á það að menn leiti samráðs og sátta. Þetta hjálpaði ekki til, nei," sagði hún.
• Ekki náðist í Oddnýju G. Harðardóttur, formann fjárlaganefndar, né Björn Val Gíslason, varaformann fjárlaganefndar, í morgun. 

Er ekki þetta rugl stjórnarmeirihlutans – þess sem nú nýtur varla nema fjórðungsfylgis skv. skoðanakönnun Frettablaðsins – dæmi um upplausnina í því liði og að þau finni endalokin nálgast? En geta þau samt ekki á væntanlegum endaspretti unnt þjóð sinni þess, að hún losni við Icesave-ásókn þeirra Steingríms, Svavars, Björns Vals, Össurar og Jóhönnu?

* Hefur samt ekki heyrzt af því, að þau hafi láti draga af launum sínum í þá hít ranglætis og rangsleitni.

** Menn geta vart lengur neitað því, að þetta var klúður af hálfu stjórnvalda. Hvað annað felst í viðurkenningu Róberts Marshall þingmanns á því í nýrri frétt á Mbl.is? Sjá hér:  Biður þjóðina afsökunar – "Róbert Marshall, þingmaður Samfylkingarinnar og formaður allsherjarnefndar Alþingis, sagðist vilja biðja þjóðina afsökunar á þeim mistökum, sem orðið hefðu við setningu laga um stjórnlagaþings og kosningar til þess ...

Rétt niðurstaða Hæstaréttar en rangar forsendur !

Merkilegt má telja að Hæstiréttur kemst að þeirri niðurstöðu, að vegna tæknilegra vankanta verði ekki komist hjá ógildingu. Að mínu mati voru þessir tæknilegu vankantar minni háttar, en efnislegir gallar hins vegar stórkostlegir. Hvers vegna kærði enginn vegna hinna efnislegu galla ?

Efnislegir gallar á kosningunni til Stjórnlagaþingsins voru eftirfarandi og hugsanlega fleiri :

1. Kynjahlutfall. Ákvæðið um jafnt hlutfall kynja á meðal fulltrúa á Stjórnlagaþingi var skýrt brot á mannréttindum. Það er ekki eðlilegra að setja svona ákvæði í kosningalög en varðandi aldur, eignastöðu eða að sköllóttir skuli vera jafnmargir og þeir sem eru hærðir um höfuðið.
2. Atkvæðamagn. Í öllum venjulegum kosningum, þar sem haft er við hönd lýðræði, gildir sú regla að þeir hljóta kosningu sem flest atkvæði hljóta. Þessi einfalda regla var ekki virt í kosningu til Stjórnlagaþings. Margir þeirra sem fengu úthlutað (ólöglegum) kjörbréfum fengu færri atkvæði en þeir sem ekki fengu kjörbréf.

Bæði framangreind atriði eru efnisleg brot á mikilvægum grundvallaratriðum. Mun betur takast til við nærstu kosningar til Stjórnlagaþings ? Ekki getur það talist líklegt á meðan þjóðin býr við óhæfa ríkisstjórn og lélegt stjórnkerfi.

Loftur Altice Þorsteinsson.

Jóhanna flytur skýrslu

Rakalaus spuni Steingríms J. um Icesave og gjaldeyrishöftin

Steingrímur J. reynir enn að þæfa áfram sinn Icesave-spuna, þvert gegn vilja þjóðarinnar og gegn framkomnum rökum. Höskuldur Þórhallsson, þingmaður Framsóknar, sagði á Alþingi í dag, "að staðan virtist vera sú að ef Icesave-samningar verði samþykktir þurfi Íslendingar að búa við gjaldeyrishöft í langan tíma" (Mbl.is). Þetta álit hans styðst við þá staðreynd, að óvissa mikil ríkir um það, hvort heildar-gervilánið geti við afléttingu gjaldeyrishaftanna rokið upp í á þriðja hundrað milljarð króna, samkvæmt ráðgjöfum fjárlaganefndar, jafnvel á fimmta hundrað samkvæmt öðru áhættumati – og þetta er óvissa sem reyndar brýtur í bága við ákvæði stjórnskipunarlaga um að skatta og lántöku-ábyrgðir ríkisins megi ekki samþykkja, sem alls óvíst sé um umfangið á.

Þar að auki er líklegt, að margir útlendingar, sem fjárfestu í ríkisskuldabréfum okkar, innleysi þau, a.m.k. að hluta, við afléttingu gjaldeyrishafta 31. ágúst nk. – þótt Steingrímur reyndi af veikum burðum að blása á þær líkur í viðtali í Rúv um daginn – og áhrifin verði þá veiking gengis krónunnar og stórhækkun hinnar ranglátu Icesave-gerviskuldar og enn meiri ríkisskulda og almennra skulda fólks og fyrirtækja.

Steingrímur sagði í svari til Höskuldar, að "ýmsir héldu því þvert á móti fram, að lausn Icesave-deilunnar sé liður í því að afnema gjaldeyrishöftin." Vísaði hann m.a. til ummæla Más Guðmundssonar seðlabankastjóra í því sambandi. Þetta voru nú gagnrökin!

Ætlast Steingrímur í alvöru til, að við tökum mark á þeim Marxista í Svörtuloftum? Hefur hans ráðgjöf til þjóðarinnar hingað reynzt rétt um meint skaðsemisáhrif þess að hafna þeim fyrri Icesave-samningum, sem Már tók afstöðu með? – Sömu hrakfallaspár bárust frá mörgum "málsmetandi mönnum" í hinni hálaunuðu verkalýðs- og atvinnurekenda-forystu, ásamt hvatningu þeirra um að borga hina ólögvörðu kröfu, og eru þeir ekki búnir að bíta úr nálinni með þá andstöðu sína við vilja þjóðarinnar.

En það er rétt hjá Ómari Geirssyni í pistli, sem mæla má með – Er ICEsave-rökstuðningurinn ekki betri en þetta??? – að það er af Steingríms hálfu ekkert svar gegn rökum þingmanna að segja, að þau séu órökstudd. Slíkt er ekki Alþingi bjóðandi, Steingrímur J. Sigfússon!

Jón Valur Jensson. 

Órökstutt að Icesave lengi gjaldeyrishöft

Synjun Icesave-laganna "mikilvægasta ákvörðun sem hann hafi tekið á forsetaferli sínum," segir herra Ólafur Ragnar Grímsson í heimsblaði

„Vilji Gordon Brown vera heiðvirður maður ætti hann að biðjast afsökunar á því að segja umheiminum að Ísland væri gjaldþrota land," segir forseti Íslands í viðtali við Wall Street Journal, ennfremur að Brown ætti að biðja Íslendinga afsökunar á framkomu sinni í garð Íslendinga í bankahruninu í október 2008.

• Hann segir að rætt hafi verið um það á þeim tíma hvort Ísland ætti að höfða mál gegn breskum stjórnvöldum. „En nú gengur okkur betur, efnahagslega, en mörgum Evrópuríkjum," segir Ólafur. 
• Viðtalið fjallar að stórum hluta um Icesave-málið og ákvörðun Ólafs um að synja Icesave-lögunum staðfestingar í janúar 2010. Segir Ólafur að frá pólitískum og stjórnskipunarlegum sjónarhóli sé það mikilvægasta ákvörðun, sem hann hafi tekið á forsetaferli sínum og hún hafi sparað Íslendingum mikið fé.

Takið eftir þessu! Og hverjir börðust harðast gegn forsetanum í þessu máli – já, af ótrúlegri óbilgirni – aðrir en einmitt núverandi Icesave-ríkisstjórn? Við ættum öll, sem komumst, að skunda niður á Austurvöll í dag, þar hefjast fjöldamótmæli gegn stjórnvöldum kl. 16.30.

• Hann segist ekki vilja tjá sig um nýtt Icesave-samkomulag, sem nú er til meðferðar á Alþingi. Þingið eigi rétt á að ræða málið án þess að forsetinn skipti sér af því.   
• Í viðtalinu er einnig fjallað um aðildarviðræður Íslands við Evrópusambandið. ...

segir ennfremur í þessari frétt Mbl.is, sjá nánar þar (tengill neðar). 

Viðtalið við Wall Street Journal er hér!

Jón Valur Jensson. 

Brown ætti að biðjast afsökunar

Stjórnvöld halda fram blekkingum. Hér má finna nokkur mótefni!

Áður en þingfundir hefjast síðdegis á morgun, er ástæða til að minna á skrif á bloggsíðu Þjóðarheiðurs – samtaka gegn Icesave:

Sérfræðiálit fjármálasérfræðinga til Alþingis: "Kostnaður gæti orðið 230 milljarðar" af Icesave-III

Einbeittur brotavilji?

Grunnhyggnir og gæfulausir lögfræðingar

Rúvið falsaði álit lögfræðinganefndarinnar um Icesave-III

Icesave-síbrotamenn, erlendir sem innlendir, halda áfram að þjarma að íslenzku þjóðinni

"Fjármálaráðuneytið áætlar að ríkissjóður þurfi að greiða 58,9 milljarða vegna Icesave fram til ársins 2016, þar af 26,1 milljarð á þessu ári og 10,4 á næsta ári." ...

Icesave-blekkingar og meiri Icesave-blekkingar

Hver sagði þetta? (Jú, þarna er skrifað um merka umfjöllun í leiðara Financial Times 15. desember sl., en hann var ekki beinlínis stuðningur við Steingrím og Jóhönnu).

Hörð gagnrýni í áliti InDefence-hópsins á Icesave-III-samning og frumvarp: samþykkir þetta EKKI, eins og það liggur fyrir

Leiðin út úr vandanum: "... Í fjórða lagi þarf að tilkynna Bretum og Hollendingum að ríkið muni ekki greiða Icesave-skuld þrotabús Landsbankans ..."

Leiðin út úr vandanum: "... Í fjórða lagi þarf að tilkynna Bretum og Hollendingum að ríkið muni ekki greiða Icesave-skuld þrotabús Landsbankans ..."

Hafið þið lesið jafn-þrumugóða greiningu í örstuttu máli á ríkisfjármálum og efnahagsástandi Íslands og þessa hér á eftir? Þar er með djörfum hætti tekið á megin-vanda og -verkefnum lýðveldisins og ekki hikað við að leggja öxina að rót hinna sýktustu trjáa í garði okkar. –Ég fagna því að geta birt þessa snjöllu grein hér á síðu Þjóðarheiðurs – samtaka gegn Icesave. –JVJ.

Leiðin út úr vandanum

Pistill [Morgunblaðið, 4. janúar 2011]

  Ívar Páll Jónsson, viðskiptablaðamaður á Mbl.

 

Sá sem þetta ritar hefur hér á þessum vettvangi reynt að benda á þau vandamál sem að þjóðarbúinu steðja. Mikil skuldasöfnun ríkissjóðs, gjaldeyrishöft sem koma í veg fyrir að hagkerfið lagi sig að aðstæðum, ábyrgð ríkissjóðs á krónueignum erlendra aðila á Íslandi, skuldir þjóðarbúsins í erlendri mynt sem ekki er til gjaldeyrir til að standa straum af, skortur á erlendri fjárfestingu vegna stjórnmálaóvissu og hafta; allt eru þetta aðkallandi vandamál sem núverandi stjórnvöld virðast ekki ráða við.

    

Til þess að finna varanlegar lausnir þarf að grípa til róttækra og sársaukafullra aðgerða. Í fyrsta lagi þarf að gera upp við Alþjóðagjaldeyrissjóðinn og segja upp samvinnunni við sjóðinn. Seðlabankinn skuldar honum 140 milljarða króna í gjaldeyri. Þessa fjárhæð þarf að reiða af hendi og einnig gera upp við erlend ríki. Hætt er við að gjaldeyrir Seðlabankans fari langleiðina með að klárast við þetta útflæði.

Í annan stað þarf að afnema gjaldeyrishöftin í einu vetfangi, um leið og ríkið neitar að nota gjaldeyrisforðann til að bjarga erlendum krónueigendum. Líklega yrði þetta til þess að gengi krónunnar lækkaði umtalsvert, með tilheyrandi verðbólguskoti og hækkun erlendra lána. Það er sársauki sem við verðum að þola. Ef bankarnir þola ekki afnám haftanna verða þeir að fara á hausinn, sem myndi þýða að fjölmargir töpuðu innistæðum.

Í þriðja lagi þarf að leita nauðasamninga hjá öðrum erlendum lánardrottnum íslenska ríkisins – einkaaðilum sem eiga skuldabréf á ríkið – og gera þeim ljóst að ekki sé til fé til endurgreiðslu samkvæmt skilmálum.

Í fjórða lagi þarf að tilkynna Bretum og Hollendingum að ríkið muni ekki greiða Icesave-skuld þrotabús Landsbankans. Ef þeir telji sig eiga kröfu á íslenska ríkið geti þeir leitað réttar síns fyrir íslenskum dómstólum.

Í fimmta lagi þarf að vinda almennilega ofan af hallarekstri ríkissjóðs, því skuldir ríkisins eru nú 109% af landsframleiðslu. Hætt er við því að vaxtagreiðslur verði ríkissjóði ofviða, hækki vextir svo nokkru nemi. Lækka þarf skatta og hefja alvöru niðurskurð, þrátt fyrir þrýsting sérhagsmunahópa.

Víst væru ofangreindar aðgerðir harkalegar. Grundvallarhugsunin á bakvið þær er hins vegar sú, að með öllu er óréttlætanlegt að láta skattgreiðendur standa straum af óráðsíu einkaaðila. Þeir, sem skuldsetja sig of mikið í erlendri mynt, verða að gjalda þess með því að verða gjaldþrota. Með höftunum höldum við gengi krónunnar óeðlilega háu og flytjum meira inn og minna út en ella. Skuldasöfnunin heldur áfram, og eftir því sem við bíðum lengur verður höggið þyngra sem við þurfum óhjákvæmilega að taka á okkur.

Ef við förum þessa leið fullyrði ég að við yrðum skotfljót að ná okkur á strik á ný. Fjárfesting myndi snaraukast, útflutningur (í krónum talið) sömuleiðis og lífskjör yrðu betri á Íslandi en víðast annars staðar.

[e-mail]

 

Ívar Páll Jónsson

Steingrímur J. Sigfússon biðst afsökunar á tali um „glæsilegan" Svavarssamning, en ...

... auðvitað er iðrun hans ekki einlæg. Fyrir örfáum dögum varði hann alla fortíðina! Nú reynir hann að bjarga því sem bjargað verður, eftir að jafnvel sympathískir frétta- og fræðimenn eru hættir að fylgja hinum eftir.

Hér má sjá hneykslanlega upprifjun (í styttri mynd) á hneykslisferli Icesave-ráðherranna.

Á sama myndbandi úr fréttum Stöðvar 2 má einnig sjá mat Stefaníu Óskarsdóttur stjórnmálafræðings á stöðu málsins, þ.e.a.s. á veikri stöðu ríkisstjórnarinnar, en þannig er hún á Vísir.is:

Staða ríkisstjórnarinnar veikst að mati doktors í stjórnmálafræði

Staða ríkisstjórnarinnar hefur veikst verulega að mati Stefaníu Óskarsdóttur, doktor í stjórnmálafræði, sem var í spjalli í Íslandi í dag eftir fréttir í kvöld. Þar var farið yfir pólitíska stöðu ríkisstjórnarinnar eftir að nýr Icesave-samningur náðist við Breta og Hollendinga í vikunni.
„Icesave hefur verið erfitt mál og vandræðalegt fyrir ríkisstjórnina," sagði Stefanía en þjóðin felldi síðasta Icesave-samning í þjóðaratkvæðagreiðslu.
Stefanía segir að eftir það hafi ríkisstjórnin ekki getað setið með hendur í skauti, sem og hún gerði ekki, því hún reyndi að þétta í röðum sínum með því að taka Ögmund Jónasson aftur inn í ríkisstjórn sem ráðherra.
„Ríkisstjórnin veiktist það mikið í kjölfarið að hún varð að bregðast við þessu," segir Stefanía um eftirleik þjóðaratkvæðagreiðslunnar.
Hún segir málflutning ríkisstjórnarinnar hafa verið slíkan að hún kenndi Sjálfstæðisflokknum mikið um það hvernig fór og því spyr hún hver á að taka heiðurinn af nýjum og mun betri samningi:
„Getur ríkisstjórnin tekið heiðurinn fyrir það eða stjórnarandstaðan og síðar forseti Íslands?" spyr Stefanía.
Hún telur það einnig veikleikamerki ríkisstjórnarinnar hvernig hún hefur talað undanfarið um að fara hægt í sakirnar. Það sé ekki í anda þess sem hún gerði áður þegar hún hafði hraðar hendur á, til að mynda við að samþykkja Icesave-samninginn hinn fyrri.
„Þetta endurspeglar stöðu ríkisstjórnarinnar," segir Stefanía sem þykir viðbrögðin vera veikleikamerki.
Stefanía segir mikilvægt fyrir ríkisstjórnina að ná víðtækri sátt um samninginn. Það verður til þess að gera forsetanum erfiðara um vik að fara gegn þingmeirihlutanum líkt og hann gerði í byrjun janúar síðastliðinn. 

Icesave á endastöð

Þrátt fyrir "tilboð" um 2,7% vexti á ríkisstjórnin að hafna Icesave-samningi og svara áminningarbréfi Eftirlitsstofnunar EFTA!!!

Getur einhver útskýrt, hvers vegna Icesave-stjórnin hefur svo mikla ánægju af að endurvekja Icesave-málið – aftur og aftur? Getur verið að henni þyki svo vænt um nafngiftina, að hún ætli að tryggja að nafnið »Icesave-stjórnin« lifi að eilífu í minni þjóðarinnar?

Allir vita að Icesave-reikningarnir voru endurgreiddir fyrir langa löngu. Það gerðu tryggingasjóðir í Bretlandi og Hollandi. Hvar fengu þeir fjármagn til þess? Það var tekið af venjubundnum iðgjöldum bankanna sem starfa í þessum löndum.

Hafa þá komið kröfur á hendur almenningi á Íslandi um greiðslu til tryggingasjóðanna, eða bankanna? Nei engum manni hefur dottið það í hug, enda þurfti ekki að hækka iðgjöldin um Pund eða Evru. Þar að auki segja tilskipanir ESB og reglugerðir nýlenduveldanna, að ríkissjóðir megi ekki koma að innistæðu-tryggingum.

Hvaðan koma þá þessar Icesave-kröfur? Þær koma frá ríkisstjórnum Bretlands og Hollands, sem ekki eru aðilar að málinu. Þessar kröfur eru forsendulausar, hvort sem litið er á lagahlið, pólitískar forsendur eða siðferðilegar. Málið er löngu afgreitt þótt Icesave-stjórnin haldi áfram að skemmta skrattanum. Þessari alræmdu ríkisstjórn hefur tekist að skrá sig í söguna sem hóp hinna aumustu af öllum aumum.

Loftur Þorsteinsson.

Vekja ber athygli á meðfylgjandi frétt (tengill hér fyrir neðan), byggðri á óstaðfestri frétt Stöðvar 2. – Lokafrestur ESA, Eftirlitsstofnunar EFTA, til stjórnvalda hér að bregðast við áminningarbréfi stofnunarinnar, rennur út nk. þriðjudag, 7. desember. Við minnum hér á fyrri grein um það mál: Hætt við svikum í Icesave-máli og erkiklúðri ef Steingrímur sendir ekki Eftirlitsstofnun EFTA rökstudda höfnun!

Brezk og hollenzk stjórnvöld vita upp á sig skömmina og er vel ljóst, að þau hafa ekki réttinn með sér í þessu máli. Þeim er fyrir mestu, að íslenzk stjórnvöld grípi ekki til lagavarna í málinu, þess vegna eru þau nú að pressa á Icesave-stjórnina hér með agni sínu. En greiðsluskyldan er engin af íslenzka ríkisins hálfu, og m.a.s. 2,7% vextir (ekki helmingurinn af þeim 5,55% sem Svavar vildi láta okkur greiða og Steingrímur kallaði "glæsilegt!") eru kolólöglegir!

Jón Valur Jensson.

Samkomulag að nást um Icesave

Icesave stendur íslenzkum stórfyrirtækjum ekki fyrir þrifum

Morgunblaðið segir fátt benda til "að Icesave-deilan standi í vegi fyrir fjármögnun íslenskra fyrirtækja erlendis." Icelandic Group hefur nú endurfjármagnað erlendar skuldir sínar fyrir 125 millj. € með tæpl. 300 punkta álagi á LIBOR. Marel gerði það sama nýlega með enn hagstæðari lánum frá bönkum í Hollandi, eins og sagt hefur verið frá hér, þ.e. með hagstæðari kjörum en íslenzka ríkið fekk frá meginlandsríkjum Norðurlanda í tengslum við efnahagsáætlun AGS. Nánar er fjallað um þessi mál í Morgunblaðinu í dag.

Jafnvel Þorvaldur Gylfason prófessor talaði í gær í viðtali á Útvarpi Sögu á þá lund, að Íslendingar gætu nú þæft Icesave-málið enn lengur gagnvart Bretum og Hollendingum og komizt upp með það, einnig gagnvart norrænu ríkjunum sem nú hafa nokkurn veginn lokið sínum þætti í AGS-áætluninni um lán til íslenzka ríkisins.

J.V.J. 

Icesave hefur ekki áhrif á erlenda fjármögnun fyrirtækja