Vanhæfur forseti ESA á ekki að sitja yfir hlut okkar

Dr. Stefán Már Stefánsson, lagaprófessor við HÍ, sérfræðingur í Evrópurétti, segir í Mbl. í dag sitt persónulega mat, að Per Sanderud, forseti Eftirlitsstofnunar EFTA (ESA), „sé mjög nálægt því að hafa gert sig vanhæfan með ummælum sínum." Sanderud þessi hefur úttalað sig mjög frjálslega um, „að Íslendingum beri að standa skil á lágmarksinnstæðutryggingu vegna Icesave-reikninga Landsbankans, allt að 20 þúsund evrum á hvern reikning," eins og segir í viðtengdri frétt á Mbl.is. M.a. hefur hann verið svo djarfur að tala með eftirfarandi hætti (skv. Mbl.is) og afar óvíst að hann hafi í raun spámannlegan vöxt til þess arna:

• Hann hefur einnig sagt það ljóst að EFTA-dómstóllinn muni úrskurða Íslendingum í óhag, komi málið til kasta hans.

Ólöf Nordal, varaformaður Sjálfstæðisflokksins, reyndi mjög eindregið að fá þá kröfu setta inn í svarbréf efnahags- og viðskiptaráðuneytisins til ESA, að Sanderud rýmdi sæti sitt í ESA, þegar um Icesave-málið yrði fjallað þar, en ekki var við það komandi, stjórnarmeirihlutinn í utanríkismálanefnd beitti sér gegn því.

Við höfðum einnig lagt áherzlu á þetta sama, Loftur Altice Þorsteinsson, Borghildur Maack, Pétur Valdimarsson og undirritaður, á fundi okkar með Kristrúnu Heimisdóttur, aðstoðarmanni Árna Páls Árnasonar ráðherra, og Helgu Jónsdóttur, sem einnig starfar í ráðuneyti hans, á fundi okkar með þeim fimmtudaginn 28. fyrra mánaðar. Fundur okkar fjögurra, ásamt fleiri félögum í Samstöðu þjóðar gegn Icesave og tveimur þingmönnum í gær, með Eiríki Svavarssyni lögfræðingi og InDefence-manni, sem vann mjög góða vinnu í þeirri nefnd, sem undirbjó 32 blaðsíðna svarbréfið til ESA, hefur sízt dregið úr þeim ásetningi okkar að vinna áfram að þessu máli.

Sigurður Kári Kristjánsson, lögfræðingur og þingmaður Sjálfstæðisflokksins, fjallað skarplega um þetta málefni í grein í Morgunblaðinu sl. miðvikudag.

Þar telur hann Sanderud, "í ljósi ummæla sinna, líklega vanhæfan „til þess að skera úr þeim ágreiningi í Icesave-málinu sem nú er til meðferðar hjá þeirri eftirlitsstofnun sem hann er forseti fyrir, enda má með réttu efast stórlega um óhlutdrægni hans í málinu“."

• Sigurður Kári spyr hvers vegna þessum rökum sé ekki teflt fram í svarbréfi íslenskra stjórnvalda til ESA, sem afhent var í upphafi síðustu viku. (Mbl.is.)

Réttilega spurt hjá Sigurði, og ummæli dr. Stefáns Más í þessa átt ýta enn á eftir þessum sjálfsagða þætti í nauðsynlegri málsvörn okkar Íslendinga.

Sjá einnig hér:

Svarbréf ríkisstjórnar Íslands til ESA

Eftir Sigurð Kára Kristjánsson: "Ríkisstjórnin þarf að útskýra hvers vegna hún ákvað að tefla ekki fram ýtrustu vörnum íslenska ríkisins í svarbréfi sínu til ESA." 

(Millifyrirsagnir þar:)

Ummæli forseta Eftirlitsstofnunar EFTA (ESA) – Fyrirfram uppkveðinn dómur – Réttlát málsmeðferð – Dómarinn víki sæti

Grein Sigurðar Kára er alla að finna á Moggabloggi hans, hér: 

Svarbréf ríkisstjórnar Íslands til ESA 

Jón Valur Jensson. 

Forseti ESA líkast til vanhæfur

Athugasemdir

[Ingibjörg Guðrún Magnúsdóttir, 10.5.2011 kl. 07:27]

Það er ótrólegt að það sé ekki haldið uppi fullum vörnum fyrir okkur Íslendinga í þessu máli.

Það hefur legið ljóst fyrir mér að við yrðum að skipta út Ráðamönnum okkar vegna ótrúverðugleika þeirra í þessu máli þar serm stefnan þeirra hefur verið í þá átt að það sé okkar að borga bara vegna...

Bara það að Per Sanderud hafi látið þessi orð falla gerir hann óhæfan fyrir mér í þessu máli og ótrúlegt að það skuli ekki hafa verið gerð ummæli um þessi orð hans í bréfi okkar...

Ég hef haft tilfinningu fyrir því að Ríkisstjórnin okkar sé óstarfhæf í þessu vegna fyrri orða og verið hálfpartin á vaktinni vegna þess, en að þessi maður eigi að taka þátt í því að fjalla um okkar mál á ekki að geta gerst vegna þess að hann er búinn að kveða upp sinn dóm í þessu með orðum sínum...

[Árni Gunnarsson, 10.5.2011 kl. 10:36]

Það er undarlega margt í vinnubrögðum ríkisstjórnarinnar sem veldur manni furðu í öllu þessu afdrifaríka máli.

[Benedikta E, 10.5.2011 kl. 11:15]

Sæll Jón Valur - Góð og gagnleg grein hjá þér.

[Jón Valur Jensson, 11.5.2011 kl. 14:24]

Kærar þakkir fyrir innleggin, gott fólk.

[Óskar Helgi Helgason (IP-tala skráð) 16.5.2011 kl. 21:24]

Komið þið sæl; félagar í Þjóðarheiðri - jafnan !

Ykkur að segja; man ég ekki fyrir víst, hvort Sigurður Kári Kristjánsson, hafi verið eindreginn fylgismaður okkar hreyfingar (NEI; við Icesave), en Birgir Ármannsson, hefir alla tíð, fylgt okkur að málum, líka sem og Unnur Brá Konráðsdóttir - og þorað að standa gegn Bjarna Benediktssyni (yngra), í þessu tilliti.

Mikill óravegur er nú; frá atorkumanninum, Jóhannesi heitnum Nordal, fyrrum Íshússtjóra, og þessu afsprengi hans, sem Ólöf Nordal ku heita, og kallast vara leiðari Bjarna Benediktssonar, innan þeirra flokks skriflis, gott fólk.

Með; hinum beztu kveðjum, sem áður - og fyrri, úr Árnesþingi /

Óskar Helgi Helgason