Menn uggandi vegna þess að yfir kann að vofa, að þeir, sem sízt skyldu, hrifsi Icesave-málið úr höndum Árna Páls

"Þeir ráðherrar, sem þarna um ræðir, utanríkisráðherra og fjármálaráðherra, sem nú sækjast eftir fyrirsvarinu á þessu máli, þeir tóku báðir þátt í því að leyna Alþingi upplýsingum á fyrri stigum þessa máls, með Svavars-samningnum, við þekkjum þetta allt saman." – Svo mælir Ragnheiður Elín Árnadóttir alþingismaður í athyglisverðu myndbandi Mbl-sjónvarps með frétt Halls Más hér á Mbl.is (leturbr. jvj).

Já, við þekkjum það mætavel, að Össur og Steingrímur leyndu afar mikilvægu lögfræðiáliti Mishcon de Reya-lögfræðistofunnar í Lundúnum,* áliti sem lagðist á sveif með rétti okkar í Icesave-deilunni, á sama tíma og þessir menn og aðrir ráðherrar héldu því fram, að málstaður Íslands fengi engan hljómgrunn meðal lögfræðinga erlendis, bara hjá fáeinum lögfræðingum hér á landi og því ómarktækum! (var gefið í skyn). Við höfum nú heldur betur séð mikinn og breiðan stuðning við okkar málstað víðan um heim meðal sérfræðinga og lögfræðinga, og þjóðin lét ekki blekkjast af þessum Bretaþægu stjórnvöldum okkar, heldur vísaði þeim bónleiðum til búðar.

Fréttin skrifaða hér á Mbl.is (sjá tengil neðar) er ekki jafn-ýtarleg og hún er í blaðinu sjálfu, en þó hafa líka bætzt við upplýsingar í dag.

• Mikil ólga er nú innan utanríkismálanefndar vegna óvissu um hvaða ráðherra muni hafa yfirvofandi dómsmál vegna Icesave-deilunnar á sinni könnu. Árni Páll Árnason, efnahags- og viðskiptaráðherra, hefur haldið utan um málið frá því að síðasta þjóðaratkvæðagreiðsla um málið fór fram í vor og framhaldsmenntun Árna Páls er einmitt á sviði Evrópuréttar. 
• Að undanförnu hefur þó verið mikið rætt um framtíð hans innan ríkisstjórnarinnar og jafnvel gert ráð fyrir því að hann muni hverfa þaðan í þeim breytingum sem yfirvofandi eru þar. (Mbl.is.)

En nú er þrengt að Árna Páli, að því er virðist umfram allt vegna afstöðu hans í Icesave-málinu, og eigum við Þjóðarheiðursmenn ekki að láta því ómótmælt, að verstu skálkarnir í málinu flæmi hann af ráðherrastóli til þess að geta sjálfir spillt þar réttarstöðu okkar til þægðar Bretum og Evrópusambandinu.

"Skálkur" er stórt orð, en augljóst var brot þessara tveggja manna í Mishcon de Reya-málinu, og lágu þó þjóðarhagsmunir við. Hefur undirritaður margminnt á það, að með því framferði hafi verið framið brot gegn ákvæðum 91. greinar landráðabálks almennra hegningarlaga, sjá hér: Össur biðst afsökunar (þó með sínum stærilætistöktum) vegna Mishcon de Reya-STÓRHNEYKSLIS. Ekkert hefur komið fram af hálfu þessara manna, sem haft hafi áhrif á ályktanir mínar í þeirri grein.**

Í Mbl.is-fréttinni segir ennfremur um Árna Pál (leturbr. jvj):

• Mikil ánægja hefur þó verið með hans störf í Icesave-deilunni og því eru nefndarmenn uggandi yfir því að málið færist aftur inn á borð hjá utanríkis- og fjármálaráðherra. En fréttastofa hefur heimildir fyrir því að [það] gæti gerst á næstu dögum og jafnvel áður en utanríkismálanefnd nái að funda um málið.

Mjög er hætt við því, að Jóhanna, Össur og Steingrímur komi þessu óþurftarverki sínu skyndilega í framkvæmd í miðjum jólaönnum eða yfir hátíðirnar, til að lágmarka andstöðuna (sbr. þegar Kremlarmenn réðust með her inn í Afganistan á jóladag 1979).

Í VINNSLU

* Hér er hin stórmerka skýrsla Mishcon de Reya-lögfræðistofunnar. Já, og þetta álit var sannarlega gert fyrir Össur og stílað á hann, það kemur strax fram á forsíðu þess: Mishcon de Reya-álitið til Össurar.

** Greinin birtist í heild í athugasemd hér á eftir.

Jón Valur Jensson.

Óvíst um forræði í Icesave

Athugasemdir

[ÞJÓÐARHEIÐUR - SAMTÖK GEGN ICESAVE, 19.12.2011 kl. 14:38]

Greinin Össur biðst afsökunar (þó með sínum stærilætistöktum) vegna Mishcon de Reya-STÓRHNEYKSLIS (á Vísisbloggi 9. júlí 2009) er hér í heild:

Þetta gerðist á Alþingi í morgun. Þar sagðist hann í ræðustóli þingsins "ekkert of góður til að biðjast forláts" – á hverju? Jú, á því, sem Bjarni Benediktsson krafði hann um afsökunarbeiðni á, þ.e. að hafa FALIÐ afar mikilvægt, brezkt lögfræðiálit, sem var Icesave-stjórnvöldum hér óþægur ljár í þúfu, um Icesave-málið, á sama tíma og Össur og aðrir ráðherrar héldu því fram, að allir erlendir sérfræðingar legðust gegn málstað okkar Íslendinga í þessu stórkostlega hrikalega kröfumáli á hendur okkur. – Með því að biðjast þannig afsökunar (forláts) á þessu var Össur að játa á sig þá sök.

Stjórnvöld í utanríkis- og fjármálaráðuneytunum FÖLDU lögfræðiálit Mishcon de Reya-lögmannastofunnar brezku, álit sem ályktaði út frá fyrirliggjandi gögnum (m.a. tilskipun Esb), að okkur beri EKKI að greiða Icesave-skuld Landsbankans. Svikræði býr hér að baki, og sviksamlegt var það – sennilega jafnvel brot gegn landráðabálki hegningarlaganna (sjá HÉR,* og dæmið sjálf!) að leyna þjóð og þing þessum gögnum. AÐRIR upplýstu um þau, ekki Össur og Steingrímur! Niður með þessa menn.

Lesið nánar um málið mína nýjustu grein, frá í morgun: Morgunblaðinu, sem hafði stutt Icesave-samning í leiðurum, OFBÝÐUR framganga stjórnvalda í Mishcon de Reya-málinu.

Og hér er önnur: Össur er ótrúverðugur – burt með hann!

* Í 2.–4. málslið 91. gr. landráðabálks almennra hegningarlaga segir svo (feitletrun mín):

• Sömu refsingu [fangelsi allt að 16 árum] skal hver sá sæta, sem falsar, ónýtir eða kemur undan skjali eða öðrum munum, sem heill ríkisins eða réttindi gagnvart öðrum ríkjum eru undir komin.

• Sömu refsingu skal enn fremur hver sá sæta, sem falið hefur verið á hendur af íslenska ríkinu að semja eða gera út um eitthvað við annað ríki, ef hann ber fyrir borð hag íslenska ríkisins í þeim erindrekstri.

• Hafi verknaður sá, sem í 1. og 2. mgr. hér á undan getur, verið framinn af gáleysi, skal refsað með …¹⁾ fangelsi allt að 3 árum, eða sektum, ef sérstakar málsbætur eru fyrir hendi.

• ¹⁾L. 82/1998, 23. gr.

[Jón Valur Jensson, 19.12.2011 kl. 23:31]

Hér eru nýjar, frekari fréttir af málinu með Árna Pál, af Rúv-vefnum:

http://ruv.is/frett/stjornarandstada-og-einn-ur-vg

Stjórnarandstaða og einn úr VG

Fyrst birt: 19.12.2011 21:05 GMT, Síðast uppfært: 19.12.2011 22:29 GMT

"Fulltrúar stjórnarandstöðunnar og einn þingmaður VG í utanríkismálanefnd vilja að efnahags- og viðskiptaráðherra fari með Icesave gagnvart ESA og EFTA-dómstólnum.

Samskipti við ESA, Eftirlitsstofnun EFTA, vegna Icesave voru rædd á fundi utanríkismálanefndar í kvöld, og bókanir gengu á víxl. Fulltrúar Sjálfstæðisflokks, Framsóknarflokks og Guðfríður Lilja Grétarsdóttir, þingmaður Vinstri hreyfingarinnar- græns framboðs, samþykktu bókun þar sem því er beint til ríkisstjórnarinnar að að fyrirsvar í dómsmálum og öðru því sem snýr að Icesave gagnvart ESA og EFTA-dómstólnum sé áfram í höndum efnahags- og viðskiptaráðherra. Æskilegt sé að úrvinnsla Icesave sé ekki á sömu hendi og aðildarviðræður við Evrópusambandið.

"Undirrituð fulltrúar í utanríkismálanefnd alþingis beinum því til ríkisstjórnarinnar að fyrirsvar í dómsmálum og öðru því sem snýr að Icesave gagnvart ESA og EFTA-dómstólnum sé áfram í höndum efnahags- og viðskiptaráðherra. Ýmis fordæmi eru fyrir þeirri tilhögun að fagráðherra fari með fyrirsvar í tilteknum milliríkjamálum og eðlilegt er að efnahags- og viðskiptaráðherra hafi áfram samráð um allar ákvarðanir í málinu við utanríkismálanefnd Alþingis. Þá hlýtur að teljast æskilegt að úrvinnsla Icesave sé ekki á sömu hendi og aðildarviðræður við Evrópusambandið. Í ljósi forsögu málsins er mikilvægt að aðkoma að málinu byggi á raunverulegu samráði allra flokka á Alþingi og að sem víðtækust sátt ríki um málsmeðferðina í samfélaginu.

Sigmundur Davíð Gunnlaugsson, Gunnar Bragi Sveinsson, Ólöf Nordal, Ragnheiður Elín Árnadóttir, Guðfríður Lilja Grétarsdóttir."

Aðrir nefndarmenn skrifuðu undir bókun þess efnið að eðlilegt væri að formlegt fyrirsvar væri á hendi utanríkisráðherra.

"Undirrituð fulltrúar í utanríkismálanefnd telja rétt og í samræmi við stjórnskipunina að hið formlega fyrirsvar vegna málareksturs gagnvart EFTA-dómstólnum sá á hendi utanríkisráðherra. Mikilvægt er að samráð milli þeirra ráðuneyta sem málið varðar verði náið og sömuleiðis samráð við utanríkismálanefnd. Jafnframt verði lögð áhersla á að utanríkisráðherra og efnahags- og viðskiptaráðherra komi fyrir nefndina til að fjalla um málsmeðferð og málsvörn Íslands.

Árni Þór Sigurðsson, Sigmundur Ernir Rúnarsson, Mörður Árnason, Helgi Hjörvar, Birgitta Jónsdóttir.""

------

Aths. JVJ:

Getur verið, að Hreyfingin (a.m.k. Birgitta Jónsdóttir) ætli að styðja ríkisstjórnina frá falli, jafnvel að koma inn í hana? Hvers vegna tekur Birgitta þátt í aðförinni að Árna Páli?

Mikilvæg er staðfesta Guðfríðar Lilju. Hún lætur ekki Steingrím kúga sig, né hægri hönd hans Árna Þór Sigurðsson.

[valli (IP-tala skráð) 19.12.2011 kl. 23:41]

En þið sem þekkið svona vel inn á lögin um Landráð, ég er ekki lögfræðingur en ég vill hvetja ykkur til að sýna fram á eitthvað sem að getur komið þessum Landsbankamönnum bakvið lás og slá afþví það voru þeir sem komu okkur í þetta. Þeir voru að falsa með ýmsum brellum eins og sást í Kastljósi og þeir vissu að bankinn væri illa staddur, samt hikka þeir ekki við að opna þessa andskotans icesave  reikninga og láta síðan okkur samBORGARANA borga fyrir sig meðan þeir eru enþá að drukkna í peningum

[Jón Valur Jensson, 19.12.2011 kl. 23:44]

Þakka þér, Valli.

[Samstaða þjóðar, 26.12.2011 kl. 11:24]

Valli, það voru ekki Icesave-reikningarnir sem komu okkur í vanda, heldur yfirgangur nýlenduveldanna og undirþægni kjölturakka Evrópusambandsins. Landsbankinn var með fullar tryggingar í Bretlandi og Hollandi, hjá tryggingakerfum þessara landa. Tryggingasjóðir nýlenduveldanna greiddu innistæður á Icesave-reikningunum, eins og þeim bar. Sjóðirnir fá síðan endurgreiðslur úr þrotabúi Landsbankans - allt eftir reglum.

Þessar staðreyndir lyfta ekki sök af bankaræningunum, né heldur mútuþægum stjórnmálamönnum. Það mun taka okkur margar kosningar að losna við spillingarliðið af Alþingi. Þetta fólk stendur leynt og ljóst gegn rannsókn málsins, en Landsréttur hverfur ekki heldur bíður valda-aðalsins, eins og fallöxin í Franklandi - forðum.

Loftur Altice Þorsteinsson.

[Jón Valur Jensson, 26.12.2011 kl. 14:57]

Tek undir þetta með Lofti.

[Jón Valur Jensson, 26.12.2011 kl. 14:58]

Tek þó fram, að ég réttlæti ekki ógnarstjórnina í Frakklandi og verk hennar ljót.

[Samstaða þjóðar, 26.12.2011 kl. 15:51]

Ekki er ég heldur að réttlæta erlendar byltingar, enda þekking mín á þeim takmörkuð. Landsdómur er hins vegar stjórnarskrá-tæki til að koma lögum yfir þá sem brotið hafa af sér og við blasir að það hafa margir valdsmenn gert.

Ég tel að þessum brotum verði ekki sópað undir teppið, heldur náist engar sættir í landinu fyrr en afbrot allra hafa verið gerð upp. Þetta uppgjör merkir líka, að Landsdómur mun sýkna þá sem saklausir eru.

Loftur Altice Þorsteinsson.

[Jón Valur Jensson, 27.12.2011 kl. 01:01]

Tek aftur undir þetta með Lofti. Gleðileg jól !