Tryggingasjóður innstæðueigenda og fjárfesta uppfyllti allar kröfur sem til hans voru gerðar

Jón Baldvin Hannibalsson hefur ítrekað haldið því fram* (til að sanna ábyrgðarleysi Íslendinga) að "ekkert fé hafi verið í Tryggingasjóðnum", en staðreyndin er sú, segir Carl Eiríksson verkfræðingur,* að sjóðurinn uppfyllti allar lagakröfur sem til hans voru gerðar um þetta. Það voru í honum 18 milljarðar króna við hrunið, og sú upphæð virðist alveg samsvara ákvæði 6. gr. laganna um sjóðinn (l. nr. 98/1999) um 1% heildareign innstæðudeildar sjóðsins miðað við innstæður í bönkum og sparisjóðum – orðrétt:

• 6. gr. Innstæðudeild.
•  Heildareign innstæðudeildar sjóðsins skal að lágmarki nema 1% af meðaltali tryggðra innstæðna í viðskiptabönkum og sparisjóðum á næstliðnu ári. ... 

Vitað er, að innistæður í bönkum og sparisjóðum voru einmitt nálægt 1.800 milljörðum króna árin 2007–8.

 

Carl minnti líka á 3. gr. sömu laga og það atriði, sem hér skal feitletrað:

•  3. gr. Aðilar að sjóðnum.
•  Viðskiptabankar, sparisjóðir, fyrirtæki í verðbréfaþjónustu og aðrir sem nýta sér heimildir laga til að stunda viðskipti með verðbréf í samræmi við lög um verðbréfaviðskipti, sem hafa staðfestu hér á landi, skulu eiga aðild að sjóðnum. [Hið sama gildir um útibú þessara aðila á Evrópska efnahagssvæðinu, í aðildarríkjum stofnsamnings Fríverslunarsamtaka Evrópu og í Færeyjum.]¹⁾ Þessi fyrirtæki, hér eftir nefnd aðildarfyrirtæki, bera ekki ábyrgð á skuldbindingum hans umfram lögbundin framlög til sjóðsins, sbr. ákvæði 6. og 7. gr. Fjármálaeftirlitið skal halda sérstaka skrá um aðildarfyrirtæki.  

Takið líka eftir 1. setningunni: það eru bankarnir, sparisjóðir og verðbréfafyrirtæki sem "skulu eiga aðild að sjóðnum," og í 2. gr. segir líka (leturbr. hér):

• 2. gr. Stofnun.
•  Með tryggingar samkvæmt lögum þessum fer sérstök stofnun er nefnist Tryggingarsjóður innstæðueigenda og fjárfesta, hér eftir nefndur sjóðurinn. Sjóðurinn er sjálfseignarstofnun og starfar í tveimur sjálfstæðum deildum með aðskilinn fjárhag og reikningshald, innstæðudeild og verðbréfadeild, sbr. þó ákvæði 12. gr.

Ef Jón Baldvin og aðrir Icesave-sinnar þráast enn við að muna þessar einföldu staðreyndir, ættu þeir að kynna sér vel þessa grein: "ESB segir ESA hafa reglulega staðfest ágæti regluverks Íslands" um tryggingasjóð innistæðueigenda

* Carl Eiríksson í Útvarpi Sögu, í innhringiþætti Péturs Gunnlaugssonar í morgun. 

JVJ skráði.

Athugasemdir

[Elle_, 1.3.2011 kl. 00:50]

Heill sé verkfræðingnum að kollvarpa rangfærslunum hans Jóns Hannibalssonar.  Og það opinberlega. 

[Sigurður (IP-tala skráð) 1.3.2011 kl. 00:54]

Gott að vita, að þjóðin hefur ekki að þessu leyti vanefnt skuldbindingar sínar. Fullyrðingar um ágalla á íslenzka sjóðnum glymja daglega í eyrum, þótt naumast nokkur reyni að segja nákvæmlega, hvað hafi verið gert rangt og á annan hátt en í öðrum löndum. Á því stendur þó eða fellur veigamikið atriði í málflutningi þeirra, sem vilja gangast undir ábyrgð á Icesave.