Hefðum þurft að greiða 110 milljarða fram að þessu í ÓAFTURKRÆFA VEXTI vegna Icesave!

Í nýútkominni bók Sigurðar Más Jónssonar um Icesave-málið kemur það fram, sem ítrekað hafði verið á bloggsíðu Þjóðarheiðurs í pistlum í haust, að þrátt fyrir að eignasafn Landsbankans gamla nægi til að borga upp allar Icesave-höfuðstólskröfurnar (upp að í mesta lagi 20.887€ á hverja), þá hefðum við Íslendingar samt þurft, skv. Icesave I, að greiða Bretum og Hollendingum gríðarlegar og óafturkræfar VAXTA-fjárhæðir, sem hefðu leikið samfélag okkar afar grátt og ýmist kollsteypt ríkissjóði eða valdið hér ómældum hörmungum. Óafturkræfar væru þær, af því að vaxtakröfur í þrotabú teljast ekki til forgangskrafna.

Samkvæmt útreikningum Sigurðar Más (sjá bls. 187 í bók hans) næmi þessi gjaldfallna fjárhæð, þar til 1. október sl., er bók hans var tilbúin til prentunar, 110 milljörðum króna! – Hvar ætlaði fjármálaráðherrann og viðhlæjendur hans að taka þessa peninga?! Hér er lokað spítölum og deildum, allt dregið saman nema helzt í sukk og óhóf, t.d. í aðstoðarmenn ráðherra, sem fá hækkun nú, en ríkisstjórnin vildi fjölga þeim upp í 31 manns!

Og meðan lokað er meirihluta Landakotsspítala til að spara 100 milljónir, taldi (og telur enn?!!!) fjármálaráðherrann, að rétt hefði verið að fleygja ellefu hundruð sinnum hærri fjárhæð í óafturkræfa gjöf til Breta og Hollendinga!!!

Hvar á byggðu bóli getur vanhæfari stjórnvöld? Ætli þeim veiti nokkuð af 31 aðstoðarmanni? Þeim verður þó engin hjálp í þeim öllum, ef ríkisstjórnin sjálf fær að ráða, hvaða vildarmenn hennar hreppi þær stöður.

Það er alveg ljóst, að Evrópusambandið tók í þessu máli afstöðu með Bretum og Hollendingum og að ýtt var þaðan á Samfylkinguna og Jóhönnustjórnina (jafnvel fyrir formlegan upphafs-starfsdag hennar) um að leggjast hundflöt fyrir kröfum brezkra og hollenzkra stjórnvalda.

Þjóðin á enn eftir að gera upp þessi mál í kosningum. 

Jón Valur Jensson. 

Athugasemdir

[Þórður Guðmundsson, 3.12.2011 kl. 09:29]

Las þessa grein. Takk.

[Jón Valur Jensson, 3.12.2011 kl. 21:52]

Þakka þér, Þórður!

[Hrólfur Þ Hraundal, 4.12.2011 kl. 11:52]

Þakka þér Jón Valur, en ekki veit ég hvort þetta hreifir nokkuð við hinum siðblinda fjármála ráðherra.  Jóhönnu líður náttúrulega vel því hún skilur þetta ekki sem svo margt annað.  

[Óskar Arnórsson, 4.12.2011 kl. 21:21]

Góð grein hjá þér Jón Valur!

Landsbankinn var kanski aldrei gjaldþrota og þá hafði Björgúlfur gamli alltaf rétt fyrir sér. Ef það verður raunin kostar það jafnmikið í skaðabætur til hans eins og ruglið í Steingrími á sínum tíma..

[Jón Valur Jensson, 10.12.2011 kl. 21:57]

Ég þakka ykkur aftur innleggin og umræðuna hér.

Grein mín um þetta mál birtist í Mbl. í dag, að nokkru leyti samhljóða ýmsu í þessari grein. Hér er hún: Ríkisstjórnin stendur uppi afhjúpuð í Icesave-málinu.