Að gefnu tilefni um Icesave-mál

Varðandi Icesave er ekki unnt að verja Sjálfstæðisflokkinn, enda gengu ýmsir, þ. á m. undirritaður, úr honum vegna slakrar frammistöðu hans þar. Hitt mátti Árni Mathiesen eiga, að ekki laut hann ógnar- og kúgunarvaldi Evrópusambandsins, Breta og Hollendinga, þegar hann neitaði að taka þátt í skyndi- og sýndarréttarhöldum gerðardóms á vegum þessara ofsækjenda okkar, þ.m.t. Evrópusambandsins. Sá gervi-gerðardómur var eins dags afgreiðsla málsins haustið 2008.

Mjög er líklegt, að Evrópusambandið reyni að vísa til þess ólöglega skipaða gerðardóms í málshöfðun sinni fyrir EFTA-dómstólnum nú og fram á sumarið, en sá dómstóll getur ekki skikkað Íslendinga til að borga eitt né neitt. Málið, hvað meintar bótakröfur varðaði, yrði endanlega í höndum Hæstaréttar Íslands, sem skoða myndi Icesave-málið út frá miklu fleiri forsendum en fordómafullir ESA-ásakendur og Breta- og Hollendinga-verjandi* Evrópusamband gera frammi fyrir EFTA-dómstólnum.

Svo má ekki gleyma hlut Samfylkingarmannanna Björgvins G. Sigurðssonar og Jóns Sigurðssonar, stjórnarformanns Fjármálaeftirlitsins, í Icesave-málinu löngu fyrir bankahrunið.

* Þar er ekki átt við brezka og hollenzka borgara, heldur brezka ríkið og það hollenzka -- og stjórnmálastéttirnar sem varð svo illilega á í því máli.

(Þetta er að verulegu leyti partur af innleggjum vegna umræðu á vefsíðu Jakobínu Ingunnar Ólafsdóttur.)

Jón Valur Jensson.

Þverbrotlegur utanríkisráðherra í Icesave-málinu

Össur Skarphéðinsson LEYNDI Alþingi mikilvægum upplýsingum 27. marz til 11. apríl, tveimur dögum áður en frestur rennur út (þ.e. í dag) til að bregðast við þátttöku framkvæmdastjórnar Esb. í lögsókn SA gegn Íslandi vegna Icesave!!! Eins og í Mishcon de Reya-málinu sat Össur á upplýsingum, sem honum bar vitaskuld að koma til Alþingis án tafar. En þetta er dæmigert um Icesave-meðvirkni ráðherrans, sem þorir heldur ekki að anda á sitt Evrópusamband og spillir þá frekar fyrir möguleika okkar sjálfra á því að andmæla þátttöku Esb. í lögsókn gegn okkur.

 

• "Íslenskum stjórnvöldum er tilkynnt þetta með bréfi dagsettu 27. mars en við nefndarmenn fréttum af þessu í útvarpsfréttum klukkan sex í gærkvöldi, 11. apríl," segir Ragnheiður Elín Árnadóttir, þingflokksformaður Sjálfstæðisflokksins. "Þetta er ekki það samráð sem utanríkisráðherra lofaði og ber að hafa við utanríkismálanefnd samkvæmt þingsköpum."
• Í umfjöllun um mál þetta í Morgunblaðinu í segist Ragnheiðar hafa gagnrýnt þessi vinnubrögð ráðherrans á fundi utanríkismálanefndar í gærkvöldi, en hann var þar viðstaddur.  "Ég geri alvarlegar athugasemdir við það að okkur hafi ekki verið tilkynnt þetta og við höfum náttúrlega enga leið til að koma að athugasemdum við þetta svar sem fer á morgun," segir Ragnheiður (Mbl.is). 

Jóhanna snýr svo öllum sannleik við í meðvirkni sinni með Esb. þegar það ræðst enn að okkur! Sjá um það grein undirritaðs í dag: Afhjúpaður blekkingavefur Jóhönnu til að réttlæta Esb-undirþægni sína þegar Íslandi er mest þörf á einurð og andstöðu

Jón Valur Jensson.

Ráðherra hélt málinu leyndu

Ríflega 50 milljarða ætlaði Jóhönnustjórnin sér að greiða í VEXTI af ENGU á nákvæmlega einu ári

Skv. nýbirtum útreikningum fjármálafyrirtækisins GAMMA hefðu vaxtagreiðslur vegna Buchheit-samningsins (Icesave-III)"samtals numið hátt í 79 milljörðum kr." til ársins 2015, þar af ríflega 50 milljörðum til þessa dags, þegar rétt ár er liðið frá seinni þjóðaratkvæðagreiðslunni um Icesave (sjá frétt Harðar Ægissonar í viðskiptablaði Morgunblaðsins í dag: Heildarkostnaður hefði verið hátt í 80 milljarðar).

Sjá einnig stutta gerð fréttarinnar hér á Mbl.is.

Blasir nokkuð annað við en að kjósa þann forseta, sem hérna stóð vörð um þjóðarhagsmuni?

Í þessari sömu viku er svo tilkynnt um þátttöku framkvæmdastjórnar Evrópusambandsins í lögsókn ESA gegn Íslandi fyrir EFTA-dómstólnum. Þetta er hin mesta ófyrirleitni af hálfu Evrópusambandsins og gengur þvert gegn þess eigin tilskipun frá 1994, sem afmarkar innistæðutryggingar einkabanka við sérstaka tryggingasjóði, sem fara skyldu (eins og hér) eftir fyrirframlögðum línum um iðgjöld til þeirra og starfsháttu; þar að auki voru Icesave-reikningar Landsbankans í Bretlandi tryggðir í brezka tryggingakerfinu!

En hin ljóta "aðkoma" Evrópusambandsins að þessu máli nú í dag kann einmitt að tengjast forsetakosningunum: að þessi þátttaka í lögsókn ESA gegn Íslandi sé úthugsað ráð spinndoktora í Brussel til að freista þess að draga úr trúverðugleik Ólafs Ragnars Grímssonar og veikja stöðu hans gagnvart öðrum frambjóðanda, sem fellur Esb-öflunum betur í geð og myndi ekki þvælast lengur fyrir ætlunarverki brezkra, hollenzkra og (hugsið ykkur!) "íslenzkra" stjórnvalda í þessu máli.

En æðsti dómstóll í málinu er Hæstiréttur Íslands. Honum er betur treystandi en þeirri ríkisstjórn, sem frá upphafi hefur brugðizt þjóðinni í þessu máli og ætlaði sér jafnvel, með Svavars-svikasamningnum, að greiða enn hærri vexti af engu! -- og allt í erlendum gjaldeyri! -- og það á sama tíma og talið er, að fjárlagahallinn í ár verði um 70 milljarðar!

Og lítum loks á þetta í frétt Morgunblaðsins:

• Það er því ljóst að heildarvaxtakostnaður ríkisins hefði orðið umtalsvert hærri en rætt var um í aðdraganda þjóðaratkvæðagreiðslunnar af hálfu stjórnvalda, en þau áætluðu að kostnaður ríkissjóðs vegna Icesave-samninganna yrði að öllum líkindum á bilinu 26-32 milljarðar króna.
• Valdimar Ármann, hagfræðingur hjá GAMMA, segir í samtali við Morgunblaðið að hærri vaxtakostnaður skýrist einkum af því að útgreiðslur úr þrotabúi Landsbankans hófust seinna en ráð var gert fyrir ...

Sem fyrri daginn fóru stjórnvöld hér með fleipur og kolrangar forsendur. Kostnaðurinn af Buchheit-svikasamningnum hefði ekki orðið 26-32 milljarðar króna, eins og reynt var að ljúga að kjósendum fyrir seinni þjóðaratkvæðagreiðsluna, heldur upp undir 79 milljarða króna!

Steingrímur og Jóhanna sögðu þannig langtum minna en hálfan sannleikann, þegar þau stóðu í sinni blekkingarstarfsemi, en fengu þó aðeins 40% kjósenda til að trúa sér! Þeir kjósendur, sem þar voru blekktir, ættu að koma fram með sín viðbrögð núna -- þeim er velkomið að tjá sig hér á vefsíðu Þjóðarheiðurs.

Jón Valur Jensson.

Kostnaðurinn hefði orðið 80 milljarðar

"Útilokað að láta eins og ekkert sé og halda áfram viðræðum um aðild að ríkjasambandi sem styður óréttmætan málarekstur gagnvart Íslandi"

"Evrópusambandið ætlar að styðja kröfur ESA gagnvart Íslandi og útilokað að láta eins og ekkert sé og halda áfram viðræðum um aðild að ríkjasambandi sem styður óréttmætan málarekstur gagnvart Íslandi. Einnig er þess krafist að sendiherra ESB á Íslandi verði boðaður á fundinn og að fundurinn verði gestafundur," segir í fréttatilkynningu frá Sigmundi Davíð Gunnlaugssyni, formanni Framsóknarflokksins, og Gunnari Braga Sveinssyni, formanni þingflokks hans.

Undir þetta skal tekið hér af heilum hug. Það gengur ekki, að stjórnvöld á Íslandi misbjóði þjóð sinni með því að "láta eins og ekkert sé" í þessu máli, og verður mörgum hugsað til annarra mála um leið, þótt þau verði ekki gerð hér að umræðuefni.

Stjórnarflokkarnir hafa lengst af, með öfáum undantekningum þingmanna, hagað sé á afar meðvirkan hátt með yfirgangsöflum Breta og Hollendinga í Icesave-málinu. Megum við nú vænta eðlilegra endaloka þeirrar meðvirkni, eða eigum við enn eftir að sjá þá rísa upp á afturfæturna á ný, Icesave-predikara þessara tveggja flokka?

Jón Valur Jensson.

Vilja fund í utanríkismálanefnd

Framkvæmdastjórn Esb. er á bandi fjenda okkar í Icesave-málinu

Náin tengsl óvina Íslands í Icesave-máli Landsbankans koma betur og betur í ljós. Framkvæmdastjórn Evrópusambandsins ætlar nú, í fyrsta skipti, að taka þátt í málarekstri Eftirlitsstofnunar EFTA gegn einu landi fyrir EFTA-dómstólnum, og auðvitað velja þau "umsóknarlandið" Ísland til þess! Allan tímann frá því að Icesave-málið kom upp, hefur Evrópusambandið beitt sér gegn okkur, t.d. í skyndiréttarhöldum gervi-gerðardóms haustið 2008, sem var þó ekki gildur vegna þátttökuleysis íslands og EFTA (af því að Árni Matthíasson hafði vit á að láta ekki narra sig í þetta). Þar, í þeim gerðardómi, tók framkvæmdastjórn Esb. afstöðu gegn rétti okkar alveg eins og sá Seðlabanki Evrópu, sem margir virðast þó halda, að bezt sé treystandi fyrir íslenzkum peningamálum!

En það var þessi sama framkvæmdastjórn Evrópusambandsins, sem hafði þó gefið Íslandi fína einkunn á bóluárunum, rétt eins og ESA hafði gert, þ.e. Eftirlitsstofnun EFTA, sjá hér: ESB segir ESA hafa reglulega staðfest ágæti regluverks Íslands.

Getum við tekið mark á svona framkvæmdastjórn? Dinglar hún ekki bara til hægri og vinstri eftir því sem valdfrekir hagsmunaaðilar innan hennar, þ.e. voldugustu ríkin, vilja við hafa hverju sinni?

Jón Valur Jensson.

ESB vill aðild að Icesave málinu

Sveinn Valfells um Icesave

Grein hans í Mbl. 14. þ.m., Icesave og traust Alþingis, var framúrskarandi. Sveinn var í dag í Silfri Egils og ræddi m.a. það mál. En lesið orð hans hér:

• Nýleg skoðanakönnun sýnir að Alþingi Íslendinga nýtur einskis trausts lengur. Það er uppskeran af störfum núverandi ríkisstjórnar og nokkurra undangenginna stjórna. Einkavinavæðing Landsbanka er gott dæmi, bankinn var afhentur „óreiðumönnum“ í málamyndarútboði, þeir voru lægstbjóðendur og fengu fjármögnun. Afleiðingin var Icesave.
• Steingrímur J. Sigfússon gerði illt ennþá verra og fékk vanhæfan pólitískan samherja til að semja um löglausar kröfur erlendra þjóðríkja vegna Icesave. Kröfur upp á hundruð milljarða vegna skulda sem stofnað var til af einkabanka sem rekinn var af „óreiðumönnum“. Samherji Steingríms samdi um einhliða uppgjöf ríkissjóðs. Steingrímur lagði samt ónýtan samning fyrir þingið. Samningnum var vísað til þjóðar og þjóðin hafnaði honum afdráttarlaust. Stórfé var varið til að laga samninginn, skárri útgáfu var samt líka hafnað.
• Ef Alþingi vill reyna vinna inn traust og virðingu þjóðar verður einhvers staðar að byrja. Augljóst skref er að draga Steingrím J. Sigfússon til ábyrgðar vegna Icesave.

Höfundurinn, Sveinn Valfells, er eðlisfræðingur og hagfræðingur. Fyrri hluta þessarar merku greinar hans má finna í nýlegum pistlum hér á bloggsíðu Þjóðarheiðurs eða rekja sig aftur á bak gegnum þessa vefslóð: "Vinnubrögðin eru ólýsanleg" - og um ráðherraábyrgð í Icesave-máli.

JVJ.

Lilja Mósesdóttir um Icesave-nauðasamninga

Lilja víkur orðum að málinu þannig:

Kröfuhafar gömlu bankanna og útrásarvíkinganna leita enn leiða til að koma kröfum sínum yfir á skattgreiðendur í stað þess að láta gömlu bankana og útrásarvíkingana borga. Forysta stjórnarflokkanna hefur ýtt undir þessa viðleitni kröfuhafanna með ítrekuðum nauðsamningum um „Icesave skuldbindinguna“, andstöðu við almennar skuldaleiðréttingar sem hefðu rýrt eignir kröfuhafa og stuðning við gjaldeyrishöft sem koma í veg fyrir að aflandskrónur og aðrar eignir kröfuhafa verði afskrifaðar. Á bak við aflandskrónurnar og eignir kröfuhafa gömlu bankanna voru einkaskuldir fyrirtækja sem fóru í þrot. Þjóðarbúið hefur því ekki efni á að greiða út þessar aflandskrónur og eignir kröfuhafa ...

Sjá nánar þessa nýju grein á vefsíðu hennar: Þjóðnýting einkaskulda -- almenningur blóðmjólkaður.

"Vinnubrögðin eru ólýsanleg" - og um ráðherraábyrgð í Icesave-máli

"Niðurstaðan var stórkostlegt klúður." Við enduðum á þeim orðum Sveins Valfells í samantekt hér á undan. Hann var að ræða um Icesave-vinnu Svavars! En frábær grein hans hélt þannig áfram:

• "Í seinna skiptið var skipaður erlendur lögfræðingur með haldbæra reynslu, Lee Buchheit. En sá hafði erfitt verk að vinna. Málið var komið í vondan farveg vegna samninganna sem flokksbróðir Steingríms hafði áður gert og Steingrímur lagt fyrir þing og fengið lögfesta.
• Ef ráðherra skipar vanhæfan mann ótengdan sér að semja í þýðingarmiklu máli, það eru stórkostleg afglöp. Að útvega flokksfélaga bitling hjá ríkinu er þjófnaður af almannafé. En Steingrímur J. Sigfússon skipaði mann sem var bæði vanhæfur til starfans og einnig samherji til margra ára í pólitík til að leiða eitt þýðingarmesta milliríkjamál í sögu lýðveldisins, hundruð milljarða voru í húfi. Vinnubrögðin eru ólýsanleg.
• Í lögum um ráðherraábyrgð segir skýrt að krefja megi ábyrgðar ráðherra sem „af ásetningi eða stórkostlegu hirðuleysi [hafi] stofnað hagsmunum ríkisins í fyrirsjáanlega hættu.“ Það gerði Steingrímur J. Sigfússon þegar hann lagði ríkissjóð að veði vegna Icesave.
• Ennfremur segir í 91. grein íslenskra hegningarlaga: „[Fangelsi allt að 16 árum] skal enn fremur hver sá sæta, sem falið hefur verið á hendur af íslenska ríkinu að semja eða gera út um eitthvað við annað ríki, ef hann ber fyrir borð hag íslenska ríkisins í þeim erindrekstri.“ Ekki verður annað séð en að Svavar Gestsson og Steingrímur J. Sigfússon hafi báðir brotið þessa grein, Svavar með frammistöðu sinni í samningum við Breta og Hollendinga og Steingrímur með því að leggja klúður Svavars fyrir þingið.
• Greinilegt er af því sem opinberlega er vitað um þetta eina mál, Icesave, að Steingrímur J. Sigfússon verðskuldar að vera ákærður fyrir Landsdóm. Hverju skyldi þá gegna um aðrar embættisfærslur hans?"

  Það er enn meira í grein Sveins í Morgunblaðinu 14. þ.m., Icesave og traust Alþingis! Engin furða, að hún hafi verið endurbirt á vef Samstöðu þjóðar, en við höfum farið rólegar í það hér, og þó er hún með því albezta sem birzt hefur um Icesave-málið og verðskuldar því að vera öllum aðgengileg. --JVJ.

Stórkostlegt klúður Steingríms og samherja hans í Icesave-máli

"Skýrt er tekið fram í tilskipun ES um innistæðutryggingar að þjóðríki skuli ekki bera ábyrgð gagnvart innistæðueigendum hafi þau innleitt tryggingakerfi. Fram kemur í skýrslu Rannsóknarnefndar Alþingis að innistæðutryggingakerfi á Íslandi var með svipuðum hætti og í mörgum öðrum Evrópulöndum, jafnvel betra en í sumum. Rannsóknarnefndin bendir á að markmið þágildandi tilskipunar ES um innistæðutryggingar hafi verið mótsagnakennd og engar athugasemdir hafi verið gerðar við íslenska fyrirkomulagið fyrir bankahrun. Rannsóknarnefndin er þeirrar skoðunar að Ísland hafi framfylgt tilskipun ES um innistæðutryggingar."

Þannig ritar Sveinn Valfells um Icesave-málið í Morgunblaðinu í dag, í grein sinni Icesave og traust Alþingis, en um þá frábæru grein var rætt hér fyrr í dag og upphaf hennar (fram að þessum texta) birt þar (sjá HÉR!).

Menn eru hvattir til að lesa greinina alla, en þegar hér er komið sögu í henni, fer að hilla undir meiri spennu í henni, eins og sést hér á framhaldinu, og eru þó mestu tíðindin og háskaþrungin spennan þá eftir, enda greinin ekki hálfnuð enn:

• Þegar bankar féllu höfðu neyðarlög verið sett til frekari verndar innistæðueigendum og ríkissjóði. Bresk og hollensk stjórnvöld ákváðu einhliða að greiða út innistæðutryggingar jafnharðan í eigin löndum og gera kröfu á ríkissjóð Íslands en ekki Tryggingasjóð eða þrotabú Landsbanka. Í stað þess að reyna verja hagsmuni ríkissjóðs af krafti skipaði þáverandi fjármálaráðherra, Steingrímur J. Sigfússon, samherja í pólitík til forystu sendinefndar sem semja átti við Bretland og Holland. Svavar Gestsson var fenginn til að semja um ólögmætar kröfur upp á mörg hundruð milljarða, liðlega þriðjung þjóðarframleiðslu, en hafði enga reynslu eða menntun til starfans. Niðurstaðan var stórkostlegt klúður."

Já, hér æstist leikurinn, og fylgið Sveini eftir í blaðinu ...

JVJ. 

Hér sér til sólar í Icesave-málinu!

Á sama tíma og sú ánægjulega frétt var staðfest, að norskur dómari í EFTA-dómstólnum hefði vikið þar sæti i Icesave-málinu vegna vanhæfi, birtist í kjölfarið mögnuð og glæsileg grein eftir Svein Valfells, eðlisfræðing og hagfræðing, í Mbl. í dag. Icesave og traust Alþingis nefnist hún og er ljúf skyldulesning fyrir alla áhugamenn um málið, en þeir skipta tugum þúsunda.

Greinin er sennilega bezta stutta yfirlitið sem birzt hefur um þetta mál hingað til. En hún er ekki aðeins yfirlit um sögu málsins, heldur leiðir einnig með skýrum rökum til niðurstaðna, sem munu standa í fáum einum, en verða mörgum augljósar og afgerandi og gera í sjálfum sér kröfu til aðgerða.

Grein Sveins Valfells hefst þannig:

• Föstudaginn 9. mars birti utanríkisráðuneytið greinargerð um Icesave. Greinargerðin útskýrir á hve veikum grunni kröfur um ríkisábyrgð á innistæðutryggingum vegna Icesave-innlánsreikinga Landsbankans eru byggðar. Greinargerðin var fyrst birt á íslensku, degi síðar á ensku eftir kvörtun til utanríkisráðherra. Enginn blaðamannafundur eða önnur kynning á efni greinargerðarinnar hefur farið fram.
• Núverandi ríkisstjórn festi í tvígang í lög samninga um ábyrgð ríkissjóðs á innistæðutryggingum vegna Icesave. Málið var á forræði þáverandi fjármálaráðherra, Steingríms J. Sigfússonar. Fyrri samningurinn var öllu verri en sá seinni. Eftir þrýsting frá almenningi og grasrótarhreyfingum vísaði forseti Íslands í bæði skiptin lögunum til þjóðar. Báðum samningum var hafnað með miklum meiri hluta greiddra atkvæða.
• Greinargerðin frá 9. mars leggur fram rök sem strax í upphafi hefðu átt að vera tíunduð vel og rækilega, ekki bara gagnvart Bretum og Hollendingum heldur einnig á alþjóðavettvangi. Málstaður Íslands hafði þar og hefur enn mikla samúð þrátt fyrir litla sem enga kynningu íslenskra stjórnvalda. 

Lesið nú framhaldið í Morgunblaðinu og sannfærizt um, hve spennuþrungin saga þetta reyndist verða og af hvílíkri snilld það var skrifað.

En dómarinn norski, Per Christiansen, sem nánast var rutt úr EFTA-dómstólnum, hafði tekið þar sæti "í byrjun árs 2011, en áður hafði hann gegnt stöðu lagaprófessors við háskólann í Tromsø í Noregi," eins og Mbl.is segir frá í frétt, en hann reyndist vanhæfur til að dæma í hinu mikla hagsmunamáli Íslendinga í dómnum, því að "sem lagaprófessor hafði hann tjáð sig í fjölmiðlum um Icesave-málið" og reyndar með neikvæðri umfjöllun um okkar málstað, með áliti, sem eðlilega var gagnrýnt fyrir rökleysu.

• Á heimasíðu EFTA-dómstólsins er tilkynning Christiansens tímasett 21. desember síðastliðinn. Í stað hans mun varadómari af hálfu Norðmanna dæma í málinu. Vakin var athygli á mögulegri vanhæfni Christiansens til þess að dæma í Icesave-málinu í frétt í Morgunblaðinu 22. júní á síðasta ári og síðan aftur 14. desember síðastliðinn. (Mbl.is.)

Hafi Christiansen tilkynnt um þetta í desember, bárust undarlega seint af því fregnir hingað. Loftur Þorsteinsson í Þjóðarheiðri hefur verið röskur við að gagnrýna setu Christiansens í EFTA-dómstólnum á þessu ári, með skýrum rökum og ágengum, og rennir undirritaðan í grun, að sú hafi verið ástæðan til að Christiansen vék úr dómnum. Ef þetta er ekki ástæðan, hefði ekki nú þegar verið búið að skipa annan mann í staðinn? En ýmsum embættismönnum er sýnt um að fá ekkert ryk á hvítflibbann, og ef við skoðum myndina með Mbl.is-fréttinni, þá kemur einmitt í ljós, að Per Christiansen er með fínustu hvítflibbamönnum Norðurlanda!

Jón Valur Jensson. 

Dómari sagði sig frá Icesave