Ósannar fullyrðingar utanríkisráðherrans um Icesave-"skuldbindingar" fá sitt náðarhögg í ritstjórnargrein Morgunblaðsins í dag

Hér er sú stutta, en afgerandi ritstjórnargrein: 

Vísvitandi rangfærslur

Fimmtudagur, 24. júní 2010

Forsprakkar ríkisstjórnarinnar segja engan ágreining um að forystumenn allra flokka vilji borga Icesave-skuldbindingarnar. Sömu tugguna hafa fréttamenn beggja ljósvakamiðlanna uppi. Öll þjóðin vill standa við sínar skuldbindingar. En það þýðir ekki að þjóðin vilji eða telji sig eiga að axla ábyrgð á skuldum einkaaðila, sem engin lögmæt ríkisábyrgð var fyrir. Það er auðvitað forkastanlegt að umboðsmenn íslenskrar þjóðar skuli vísvitandi blanda í eina niðurstöðu sjónarmiðum sem eru algjörlega öndverð. En því miður er sú gjörð orðin næsta fyrirsjáanleg. Framganga fyrrnefndra fjölmiðla er á hinn bóginn mikið undrunarefni, svo ekki sé kveðið fastar að. Formenn Sjálfstæðisflokks og Framsóknarflokks hafa rétt einu sinni vísað rangtúlkunum Össurar Skarphéðinssonar á orðum þeirra og viðhorfum á bug. Bjarni Benediktsson bendir á að eitt sé að vilja að borga það sem mönnum ber og annað að láta undan ólögmætum kröfum. Sigmundur Davíð segir enn og aftur að Íslendingar vilji standa við sínar skuldbindingar allir sem einn en það hvíli engin skuldbinding á íslenska ríkinu vegna Icesave. Sjálfsagt mun Össur halda rangfærslum sínum áfram. En munu fjölmiðlarnir gera það líka? 

Athugasemdir

[Elle_, 25.6.2010 kl. 21:37]

Hvað veldur að aftur og aftur skuli sumir fjölmiðlar koma með Icesave-rangfærslur beint úr munni Icesave-stjórnarinnar sem frétt væri?  Ekki skal mann undra að slúðurstöð Jóns Á. Jóhannessonar, nema stöðin hafi kannski verið hirt af honum upp í sektir og skaðabætur, skulir fara með slíka vitleysu.  Það er hinsvegar óþolandi að RUV okkar landsmanna skuli fara með lygasögur hættulegra stjórnmálamanna, sem fréttir væru.  Stoppi þetta ekki, hlýtur það að verða okkar krafa að RUV verði lagt niður og peningarnir notaðir í ALVÖRU fréttastöð.